DI L’OPRA DI LI PUPI SICILIANI
L’URIGINI
Li ràdici dû tiatru dî pupi s’attròvanu ntâ littiratura cavalleresca mediuevali e ntê puemi èpici, comu la “Chanson de Roland” e li rumanzi dî cicli carolingi e bretoni, ca narranu l’atti dî cavaleri cristiani contru li mauri, ma puru avvinturi liati a l’amuri, a l’onuri e a la magìa. Sti cunti agghicaru n Sicilia duranti lu mediuevu, unni appoi foru trasmittuti a vuci, subbennu nfruenzi lucali e trasfurmànnusi cô tempu ‘n cunti pupulari amati dû pùbbricu sicilianu
L’OPRA DI LI PUPI SICILIANI
Lu tiatru dî pupi nasci e si sviluppau tra la fini dû XVIII e lu nizziu dû XIX sèculu, addivinennu nu veru finòminu culturali n Sicilia La sò diffusioni è particularmenti forti ntê cità di Palermu e Catania, chi dunarà locu a dui diversi tradizzioni, cu stili e tècnichi distintivi:
- La Scola di Palermu: Li pupi sunnu cchiù suttili, cu junturi sèmplici ca pirmèttunu muvimenti liniari. Li spittàculi sunnu carattirizzati di nu ritmu drammàticu e sulenni, cu attinzioni ê gesti e â narrazzioni.
- La Scola Catanisi: li pupi sunnu cchiù granni e pisanti, cu armaturi dittagghiati e junciuti ca cunsentunu gesti cchiù larghi e cumplessi. La narrazzioni è vivaci e li sceni d’azzioni sunnu spittaculari.
LI PERSONAGGI E LI STORI
Li pirsunaggi principali dû tiatru dî pupi sunnu li paladini dâ Francia, cu Orlandu e Rinaldu ô capu, li granni eroi cristiani fideli ô mpiraturi Carlu Magnu Li sò avvinturi sunnu attornu â guerra contra li Mauri, ô tradimentu di Ganu di Maganza, e ê cunflitti d’unuri e d’amuri, comu l’infatuazzioni di Orlannu pâ bedda Angelica. Ogni pirsunàggiu rapprisenta virtù e difetti umani, rapprisenta valuri comu lu curàggiu, la fidiltà, l’amuri, la lealtà e puru lu tradimentu. Chisti pirsunaggi sunnu prisintati cu na prufunnità emutiva ca li renni icònici e amati dû pùbbricu.
LI TEMI E I VALURI
Lu tiatru dê pupi non è sulu n’esibbizzioni spittaculari: è nu menzu pi cuntari li valuri univirsali e li cunflitti ca riguardunu la cunnizzioni umana. Li temi di l’unuri, dâ lealtà, dû tradimentu e di l’amuri eternu sunnu trasmittuti cu passioni, addivintannu puru na lizziuni murali pô pùbbricu. Ogni spittaculu offri na lizziuni dâ vita, unni l’eroismu e lu sacrificiu sunnu valuri di ammirari e prisirvari.
L’ERIDITÀ E LU FUTURU DÎ PUPI SICLIANI
Oi, l’Opra dî pupi nun è sulu na Riliquia stòrica: è na tradizzioni viventi ca si rinnuva grazzi ê spittàculi muderni, spissu arricchitu di ticnoluggìi multimediali e tècnichi nnuvativi Li pupi di oggi cuntinuanu n’eredità seculari, circannu di prisirvari lu fascinu e l’autintitità dî pupi, ma ô stissu tempu adattànnuli ê gusti e ê sinsibbilitati dû pùbbricu cuntimpuràniu.
La storia dî pupi siciliani è nu sìmmulu dâ risistenza culturali dâ Sicilia. Attraversu li pupi, la Sicilia cuntinua a cuntari la sò storia, mantinennu vivu nu patrimoniu chi unisci passatu, prisenti e futuru.
I TECNICHI E L’ARTIGIANATU
La criazzioni dê marionetti richiedi granni artiggianatu. Ogni pupazzu è sculpitu e addicuratu cu dittagghi minuzziusi, dê facci espressivi a l’armatura di mitaḍḍu artiggianali. Lu misteri dî pupi, cioè li costruttori e l’upiratura dî pupi, veni tramannatu di ginirazzioni ‘n ginirazzioni. Li spittàculi stissi sunnu nu miscugghiu di narrazzioni orali, accumpagnamentu musicali, scenari pittati e muvimenti di marionetti, upirati cu cordi e fili ca dùnunu vita ê marionetti nna na manera quasi màggica.
Carmelo Guarnieri, Mastru Puparu di Girgenti
